HANITR'ONY
Tononkalo
Monina aiza ny fanahy ?
Ny fanahy onenanao no taratry ny endrikao
Ny endrikao fanahy ry mpandalo mba lazao
Maso taratra hazavana kajakajam-pahendrena
Sa tevan-kaizin-kitsokitsoka mahafaty ny volena
Eny am-bato miantendro soritry ny fahanginana
Any am-para vazan-tany tsy todin-kely fanambinana
Sa eo am-patan-tsy misorona iharenan'ny feno arina
Sasatry ny tenin-doto, lanaky ny tsy tafarina ?
Monina aiza ny fanahy izay onenanao ry Olona
Lany dìa mihazakazaka mifanenjika olonolona
Raha tokona hifanohana hisongàna ambonimbony ?
Ny fotoana izay mandoko ny endrikao ho takariva
Mbola ho lany verivery amin'ny taratra mihaiva
Sa homenao hampisandratra ny endrikao fanahy ho tony ?...
Hanitr'Ony
TSIKY FOANA
Laka-notefen'ambora
Zahatra entin'onja mora
Sambo vy mpisedra onja
Mety halentik'ora monja
Rehefa sendra ny mafonja
Tsy voasedra ka nanonga...
Tsiky foana ihany asetry
Ny sompatry ny hery setra
Torohevitra natolotra
Niova ho rofy nampimolotra
Izato endri-nolalaina
Nety ho tena nantenaina
Nefa zary nampangaina,
Ny fitiava-nambakaina...
Aza avela ho voafafa
Tsiky foana no fanafa.
Vony teo amoron-driana
Tsy notazana, Raondriana
Fa dia vatra nibitsihana
Sy norohana ho fihina
No nandao tsy nisitrihana
Ha! 'ty fela-nilitihana!...
Tsiky foana aloha asolo
Ratram-po efa mandolo.
Fanambinana no antsoiny
Fiherenana ho ambony
Famafàna lonilony
Faneken-tsy ho resy intsony
N'inon'inona ampitsoiny
Andramo kely anie 'zany, hono,
Tsiky foana foana alohany
Dia lefahany ny fony...
Hanitr'Ony